Carlos Núñez foi galardoado no apartado de Promoción Cultural pola súa tarefa de divulgación da cultura galega no mundo. Unha tarefa que o gaiteiro vigués recoñece como unha necesidade e na que asegura sentirse «algo pioneiro».
Núñez sinala que hai moitos anos que lle preguntaban por que traballa tanto fóra e cre que a resposta a esa pregunta é moito máis obvia agora que hai cinco ou seis anos. Explica algo da súa xeración: «Crecemos cun sistema de protección da cultura que agora está desaparecendo e para seguir facendo música temos que buscar outros mercados, porque parece que o mercado interior non vai ser suficiente». «Temos que facer do mundo a nosa casa e así é posible que os novos sigan facendo música e vivindo disto», explica o gaiteiro.
No mesmo sentido, Núñez lanza unha mensaxe de optimismo para os novos, aínda que quizais «haxa que recupera a figura do aprendiz para pasar desde os estudos aos escenarios».