O pasado día 19, Méndez Ferrín dirixiu unha carta aos membros da Real Academia Galega na que se postulaba como posible presidente da institución e na que pedía o apoio dos académicos.
A carta, sinxela e directa, comeza por explicar aos académicos a intención de Méndez Ferrín de concorrer á presidencia da institución académica, unha intención que atribúe a petición realizada ao escritor por un grupo de colegas. «Estou a che participar que me postulo, a petición dalgúns colegas, para a presidencia da Academia». O escrito segue a continuación reclamando o apoio dos académicos para esta intención antes de despedirse.
O académico galego preferiu onte non confirmar a existencia desta carta alegando que son «cousas internas da Academia».
Non obstante, nalgúns sectores da Academia dan por feito que o envío da carta supón a apertura do proceso electoral para elixir ao novo presidente da RAG. Un proceso no que, segundo algunhas voces, deberían integrarse todas as sensibilidades da institución.