O aniversario de «A Esmorga» revive a obra fotográfica de Blanco Amor

CULTURA

A exhibición pertence ao Outono Fotográfico e recolleuse en 1993 nun libro editado polo Clube Alexandre Bóveda

10 nov 2009 . Actualizado a las 11:58 h.

A mostra Eduardo Blanco Amor e a fotografía é un traballo que xermola na vontade do colectivo cultural Alexandre Bóveda no momento en que a Deputación compra os fondos gráficos legados polo escritor Eduardo Blanco Amor aos seus familiares. Florece sobre as follas da publicación que este colectivo editou en 1993 baixo o irrebatible epígrafe Eduardo Blanco Amor fotógrafo. E a resulta chega no 50 aniversario da publicación de A Esmorga e o trinta do pasamento do autor. Trátase dunha exposición que recollen a faceta de fotógrafo do artista ourensán, con pezas que proceden dun traballo que no seu día coordinou Benito Losada, a mesma persoa que hoxe dirixe o Outono Fotográfico, certame no que está enmarcada a mostra dedicada a Blanco Amor e que poderá verse no Auditorio Municipal de Ourense desde o próximo día 24 de novembro é ata o 1 de decembro. As 64 pezas expostas, segméntase en tres apartados: personaxes, viaxes e Galicia. Persoeiros da historia nacional e galega como Azaña, Lorca, Maruja Mallo, Rafael Alberti, Indalecio Prieto ou Castelao, entre outros, os retrata Blanco Amor dende a proximidade que lle brindaba a súa boa relación con cada un deles. No marco das viaxes, son as súas experiencias por Venecia, Chile, Patagonia, Marrocos e o resto dunha España rural empobrecida, aos obxectivos desta paixón altruísta. No escenario galego, as estampas fixan a sal de prata do seu papel nos oficios que imperan nun rural decimonónico que se estende do interior a costa sen excepcións, coa presenza frecuente da figura da igrexa e os seus rituais.

«O fillo da florista»

O fillo da florista

é o título do seguinte volume editado por o colectivo ourensán en 1998, e que xustifica a outra mostra incluída no Outono Fotográfico, onde o escritor fillo dunha florista é o personaxe retratado por outros profesionais dun arte cada vez máis plural e emerxente. As imaxes publicadas, nesta ocasión, ofrecen o perfil iconográfico -e social- que o escritor non acadou en vida.