CGAC Recuperar o prestixio e mellorar as cifras de visitantes, retos do CGAC

Arredor do Centro Galego de Arte Contemporánea e da figura do seu novo director comezaron a establecerse algunhas expectativas en Galicia. Mentres Miguel von Hafe non toma posesión á fronte do que segue considerándose institución de referencia no sector, o sector marca algunhas necesidades e posibilidades para o futuro inmediato.

Hai, cando menos, tres retos no horizonte do CGAC. O primeiro deles, a dicir de profesionais diferentes do contemporáneo, é recuperar prestixio. O segundo é establecer unha liña de funcionamento clara, e o terceiro, solventar algúns problemas de carácter laboral que permanecen larvados e que pasan dunha administración para outra.

De portas para fóra está tamén a cuestión do número de visitantes que, segundo quen conteste, é máis ou menos importante pero que o conselleiro de Cultura xa colocou no centro do debate. Para a presidenta da comisión de Artes Visuais do Consello da Cultura Galega, María Luísa Sobrino, «o centro non debe planificar a súa programación só tendo en conta o número de visitantes». Sobrino, que forma parte do padroado do centro, sinala a importancia «de que haxa dinámicas xeradas polo centro que chamen polo público, pero teñen que pesar criterios de calidade e de novidade sobre a xestión».

O escultor Manolo Paz apunta que a presenza do público é imprescindible, pero apunta á necesidade de que os artistas galegos «teñan algo que dicir, e poidan formar parte da programación en pé de igualdade cos que se queiran traer de fóra».