As matemáticas non teñen por que ser un problema. A escritora ceense Rocío Leira, licenciada en Matemáticas pola Universidade de Santiago e doutorada en Matemática Aplicada á Enxeñería, leva tempo combatendo este tópico. A autora de Universo Pitágoras busca quitarlle a mala sona que tivo sempre esta materia e facela un pouco máis amena e atractiva para os cativos. «Existen un montón de xogos de lóxica para divertir aos nenos e fomentar o razoamento dedutivo. O obxectivo é que os pequenos non vexan as matemáticas coma algo abstracto e espertarlles o interese por elas».
A escritora, que ten recibido máis de 150 premios literarios, desafiará hoxe en Compostela as mentes dos rapaces nestas vacacións de Nadal cun obradoiro de xogos matemáticos e lóxica. A actividade, dirixida a nenos de entre 7 e 12 anos, terá lugar no salón cultural do Corte Inglés a partir das seis da tarde.