No que se celebra mañá en Lugo, as músicas e os bailes arxentinos e uruguaios convivirán coa tradición galega
21 nov 2008 . Actualizado a las 02:00 h.Mil quilos de castañas do Courel e cincocentos litros de viño, ademais de auga e refrescos. Estes serán os ingredientes principais do magosto popular que terá lugar mañá a partires das cinco da tarde na praza de Santa María da capital luguesa, que estará cuberta por unha carpa.
O acompañamento virá dado pola música e a danza típicas de Arxentina e de Uruguai. Como este é un magosto pola tolerancia, que cada ano está dedicado a un colectivo social, nesta ocasión serán os arxentinos e os uruguaios os convidados de honra nesta cita na que as súas tradicións convivirán coas galegas, baixo a organización do Concello de Lugo e da asociación de rioplatenses desta cidade.
Actuacións
No programa de actuacións para este magosto figuran por exemplo Lucía Diez e Marco González, membro do Ballet Nacional e do Ballet Folclórico de Arxentina, que realizarán unha exhibición de diferentes bailes típicos desa terra, entre eles o tango.
Batital, o grupo lucense que une as tradicións galegas con diferentes sons do mundo, presentará precisamente o seu espectáculo Sons do mundo , no que repasan os distintos estilos musicais que practican, dende a bossa-nova e a música clásica ata o tango, pasando polo bolero, o folclore galego, o blues , o charlestón , o swing ou o fado. Versións orixinais e composicións propias con letras en galego mestúranse nun apaixonado percorrido polos distintos estilos musicais, empregando, xunto á batería, a frauta, a guitarra eléctrica o acordeón ou o tiple, instrumentos de pulso e púa noutros tempos de gran arraigo en Galicia, pero hoxe esquecidos nesta terra, como a mandolina, o laúde e a bandurria.
No ano do seu vinte aniversario, o grupo teatral Achádego representará un fragmento do seu espectáculo O libro de ler e desler (no que escenifican diferentes lendas e historias galegas, neste caso lendas sobre trasnos). De seguido farán xogos tradicionais cos asistentes ao magosto.
O Conservatorio lucense de danza e a academia de baile Ritmo Lugo escenificarán nun espectáculo a historia do tango, desde as súas orixes como baile dos escravos ata o tango actual, pasando polos primeiros tangos do porto de Bos Aires e rematando coa súa fusión con outros ritmos.
O colectivo cultural María Castaña deleitará aos asistentes cunha ruada; mentres que Urumundo, colectivo de uruguaios afincados en Galicia, traerá a este magosto un espectáculo de baile e percusión: o candombe.