crónica Á busca do tesouro polo casco histórico monfortino

As Noites alternativas chegan esta fin de semana ao seu fin e na noite de hoxe organizarase un xogo moi especial para celebralo: a busca do tesouro. A mecánica do actividade é a seguinte: os distintos equipos participantes deberán ir localizando unha serie de puntos xeográficos nos que hai varias pistas con adiviñas que terán que resolver para descubrir a ubicación do tesouro. Os tres equipos que primeiro cheguen á última pista deberán pasar unha proba definitiva, na cal se decidirá quen será o gañador.

O xogo, que partirá do parque dos Condes a partir das 22 horas, estenderase ao longo do casco histórico de Monforte e abarcará un percorrido duns cinco kilómetros.

Os equipos deben estar integrados por un mínimo de tres membros e un máximo de cinco. A diferencia da primeira edición da busca do tesouro, que se celebrou o ano pasado, non se farán distincións entre grupos integrados por menores e adultos, pero en cada grupo será obrigatorio que haxa alo menos unha persoa maior de idade.

Ao longo de toda á actividade, os participantes deberán cumprir a principal norma do xogo: non poden empregar ningún tipo de vehículo de motor para ir dun punto a outro.

O premio para o equipo gañador consiste nun cheque regalo de 300 euros para canxear nun establecemento de Monforte en material informático. A iniciativa foi organizada pola concellería de Xuventude do Concello de Monforte, a vicepresidencia terceira da Deputación de Lugo e a agrupación local da Cruz Vermella.

Aínda que xa hai tres equipos inscritos na actividade, todos os que desexen participar nela poderán apuntarse esta noite antes de que comece a celebrarse.

Punto e final

A edición das noites altenativas 2010 remata mañá. De 21 a 22 horas está programada unha exhibición de ximnasia rítmica da man do club Quicela. A partir das 22 horas desenvolveranse as actividades das noites alternativas e as 00.00 horas, un concerto con grupos locais porá o punto final a un mes de actividades. Subirán ao escenario The Poets Of Silence, B'Puppets e Crash The Ocean.