O equipo de alevíns da Escola de Fútbol Lalín co que Xabier Sueiro se desprazou a pasada fin de semana ata a localidade lusa de Vila Real retornou á capital do Deza co título no peto. Os pequenos futbolistas dezanos proclamáronse campións do torneo internacional na súa categoría logo de gañar todos os encontros que disputaron.
O primeiro rival que superaron os alevíns da EF Lalín foi o Amarante, ao que se impuxeron por 1-0 con gol de Brais a falta de tres minutos para o remate. Un marcador 2-1 foi o que se adxudicou o equipo do Deza ante os anfitrións, o Vila Real, con dous goles de Manu. O terceiro encontro da primeira rolda non chegou a disputarse ao non presentarse o equipo rival, que non puido chegar ata a localidade lusa por mor do temporal de neve.
Xa na final, a EF Lalín enfrontouse á Escola de Fútbol Fernando Pires, á que se impuxo pola mínima cun gol de Cristian a pase de Fernando no minuto 7. Os dezanos souberon aguantar todo o encontro, adxudicándose así a vitoria. Sueiro amosábase moi satisfeito cos xogadores tanto polo seu rendemento deportivo, como polo comportamento.