Despois de estar unha longa tempada traballando en Suíza, concretamente nunha fábrica de cosméticos, Leticia Bermúdez estableceuse na vila de Muros, onde non tardou en atopar emprego como carniceira.
-¿Traballara algunha vez nisto con anterioridade?
-Si, meu pai tiña carnicería no Pino de Val, así que coñezo o negocio dende nena. -¿Que é o que prefire facer no seu traballo? -Fago de todo, picar carne, chourizos, zorza; ata facemos pan e os domingos asamos churrasco, pero o que máis me gusta deste traballo é o trato directo coa xente, sempre hai un tema de conversa e dese xeito o traballo lévase mellor. -¿Cal é o produto estrela ou o que prefiren os seus clientes? -Dende logo a carne que ofrecemos é de moi boa calidade, matamos na casa xa que meu irmán ten unha explotación gandeira. Deste xeito temos completa seguridade no produto que ofertamos e á clientela vémola contenta, logo o xeito de elaborar a zorza ou os chourizos xa é cuestión de gustos. -¿Como ve a chegada do verán? -O verán soe ser unha época na que non se para de traballar, xa que hai moitos turistas na zona. Pero tamén te ríes moitos, tentando falar idiomas. O certo é que, dentro do malo de ter que estar a currar, lévase bastante ben.