Entrevista «Os de Ourense sómosche tan festeiros polo licor café»

? Fundáronse en 1999, daquela como un grupo de música tradicional. A súa proposta foi derivando cara novos camiños máis relacionados coa mestizaxe sonora e cunha clara compoñente festiva. Unha liña que quedará definitivamente plasmada en pouco máis dun mes no novo disco do grupo, o terceiro. Un traballo no que se mesturan todo tipo de influencias e no que colaboraron artistas como Xabier Díaz de Berrogüetto, a rapeira viguesa Aid ou compoñentes de Lamatumbá como Sergio Zearreta, Iván Varela e Ángel Gafas. Mañá no Con do Moucho, na Illa, adiantan en directo o que será ese Histérico latexo.

-Un título suxerinte. De onde sae?

-Buscabamos algo que, ademais de ter sonoridade, transmitira paixón. A paixón coa que creamos este disco. E xurdiu esta expresión que citamos nun dos temas. Efectivamente, pareceunos suxerinte e moi visual.

-Din que a súa música é inclasificable pola variedade de estilos que poden chegar a tocar.

-Si, nun concerto noso podes encontrar dende un reggae, a un riff de guitarra de hard rock, pasando por un bolero, unha bossa nova e, por suposto, sen esquecernos dos ritmos latinos ou incluso a rumba. Gústanos a música en xeral. Que lle imos facer! E ademais somos moi prolíficos.

-E moi gamberros?

-Iso non se pode perder nunca. De feito, por iso volvemos á Illa. No concerto que demos hai un ano pasámolo realmente ben e tratáronnos aínda mellor.

-Que pasa en Ourense que hai tantos grupos festeiros?

-A xente di que é polo licor café (rise). Debe ser porque como non temos mar e fai moito frío temos que buscar o calor doutro xeito.

-No disco participan varios membros de Lamatumbá. Son o seu referente?

-Son grandes amigos. De feito compartimos local de ensaio con eles. E, si, inspírannos cousas pero en canto a referentes musicais, temos outros.

-Son sete compoñentes no grupo, pero aínda non lles chega, que ten que buscar colaboracións?

-Estamos explorando moito con músicas distintas. Daí que xurdira a posibilidade de traballar con artistas que van do hip hop ao folk. Para nós é un auténtico luxo.

-Queda algo en Guezos daquel grupo de música tradicional que eran hai dez anos?

-En Guezos queda moito de todo. Pero si, neste disco incluso recuperamos un dos primeiros temas do grupo, o que canta Xabier Díaz, que soa moito a todo aquilo.

-Pódese chegar a saír fóra de Galicia cunha proposta deste tipo?

-Nós algo fixemos, pero non é o noso obxectivo. E menos nestes tempos. Onde si podemos ter un mercado interesante é en Portugal.