crónica Galego en todas as súas feituras

Vilagarcía, Cambados e O Grove sumáronse, onte, a un feixe de vilas e cidades espalladas polo mundo enteiro, de Gondomar a Bruxelas e de Santiago a Madison (Wisconsin) na presentación simultánea de 55 mentiras sobre a lingua galega, un pequeno tratado que, editado por Laiovento en colaboración co colectivo Prolingua, desfai unha chea de tópicos e falsidades encol do idioma propio de Galicia nun momento no que, precisamente, se está a debater o seu futuro nun eido tan fundamental como é o da educación. Polo que respecta á capital arousá, a sala de conferencias do auditorio viuse ateigada nun acto ameno e distinto, que contou coa proxección dun documental dirixido por Xavier Marqués. O traballo, desenvolvido na propia Vilagarcía, propón aos entrevistados cuestións abertamente absurdas sobre elementos como a bandeira galega, o himno ou a letra da Rianxeira , procurando unha resposta por parte dos protagonistas que en algunhas ocasións chega a ser contraditoria a tope. Presentaron o acto Cruz López, Héctor Silveiro e Carlos Blanco, membros de Prolingua, así como Xan Guillén que fixo as honras polo que respecta ao libro.

Sete mentireiros, sete

Consistía o asunto en escoitar a sete mentireiros escollidos: a escritora Susana Sánchez Aríns, co seu interesante concepto sobre os neofalantes; Vítor, un mariscador de A Illa que deu toda unha agarimosa lección de toponimia e linguaxe práctica aplicada ao mar; o creador Xaquín Chaves, que reflexionou encol do papel de medios de comunicación e ensino; Raio, un dos integrantes da factoría de camisolas Caramuxo, que argumentou con tino que somos galego, queirámolo ou non; Pedro Montero, físico oceanográfico ao que o galego lle abriu amplas portas comunicativas en Portugal; Andrés, propietario da cafetería La Marina e o pub Musaraña, quen botou por terra todas as parvadas sobre as supostas eivas que falar galego provoca aos rapaces; e Serxio González, xornalista desta casa que falou de todo un pouco, mesmo de Gran Hermano e do convinte que resulta que o falar galego non engorde nin suba o colesterol.

Música de primeira

Mención aparte merecen os rapaces de Borderline 79, que se atreveron con tres pezas: Lela , con letra de Castelao; Miña terra galega e sobre todo Lingua proletaria , o poema de Celso Emilio que eles mesmos musicaron de xeito excelente. Horas antes, o Concello entregaba os premios do certame gráfico pola normalización lingüística aberto aos institutos da bisbarra. O mundo en galego , de María Arroyo Martínez (2º da ESO, Castro Alobre), No mundo en galego , de Jina Marcela Pinzón (Castro Alobre), En galego, de Alfonso Silva (Miguel A. González), Galego, sóprallo ao mundo , de Andrea Vidal (Monte da Vila), Nomes de linguas, de Gabriel Fernández Lois (Monte da Vila) e O mundo que importa é o teu , de Emilia Portas (Ramón Cabanillas) foron os galardoados.

O mellor prato, no Hotel Carril

Nada mellor para un galego que falar e falar na mesa. Unha proposta que se inaugurou onte e poderá degustarse todos os venres deste mes e por encarga: o cocido do restaurante Plácido, no Hotel Carril. Sopa, cachucha, costela, touciño, lacón, chourizos, grelos e garavanzos, filloas salgadas e recheas de crema e chocolate, viño e licores. Só 28 euros que abren o apetito.