Entrevista | xosé ríos profesor de servicios de restaurante e bar DO IES DE FOZ «O campionato de baristas pode axudar a abrir as portas»

Cada vez é máis coñecida a profesión de barista, pero aínda queda camiño na súa difusión. Dous campionatos de baristas, das escolas de hostalería e da rexión noroeste da SCAE, volven a convertir o IES de Foz no centro das miradas dos profesionais, alumnos e ex alumnos, de distintos rincóns do país. A labor de coordinación recae no profesor Xosé Ríos (Carbia-Viladecruces, 1967) un ano máis, que leva xa 16 neste centro de referencia.

-Fan o terceiro campionato das escolas. Hai experiencia, pero os nervios non llos quitará ninguén...

-Este ano temos dúas comunidades máis que participan, aparte da galega, a asturiana e a cántabra. O fixemos pensando nunha homenaxe ao Xacobeo e á ruta norte.

-¿Cre que ten algunha repercusión o feito de conseguir un bo posto nestes campionatos de baristas?

-Si, a proba é que temos dous alumnos premiados que están como baristas, Diego López e Víctor Couto. Penso que pode axudar a abrir as portas. Hai unha nova publicada pola Voz de Galicia, que di que na Mariña é onde mellor café se toma, así que algo teremos nós que ver.

-¿Como vive estes días, con tensión ou non?

-Relaxadiño... pero tenso.

-¿Están máis pendentes dos participantes do IES?

-Os alumnos están preparados para voar sos.

-¿Cantos premios hai?

-Primeiro, segundo e terceiro en cada campionato e detalles para todos eles doados polos torrefeactores. Tamén hai unha degustación aberta ao público de Veracruz, Cafento, Bonka e Toscaf.

-¿Como lle gusta o café?

-Como o dos italianos, so e corto, bastante ácido, e sen azucre. Eu de tomar un par de cafés malos non quero saber nada... ¿por que cre que moita xente o toma con leite?

-¿Poderíase facer un perfil según tome un o café?.

-Si, penso que se podería chegar a facer...