Iago Fernández é un dos donos, xunto con José Manuel Varela e José Augusto Fuentes, de Nosferatu bar de cine, o novo local de ocio de Casas Reais que ten o mundo do cine como seña principal de identidade.
-¿Como xurdiu este proxecto?
-Os tres tiñamos ganas de montar un negocio deste tipo e decidimos facelo de xeito conxunto. Ademais, José Manuel é técnico de son e xa estaba bastante metido no mundo do cine.
-¿Por que un bar de cine?
-En xeral, en Santiago existe unha carencia de locais de ocio temáticos, e por iso pensamos que un bar ambientado no mundo do cine podía ser unha opción atractiva.
-¿Qué ofrece Nosferatu bar de cine?
-Nosferatu non é un bar ao uso, xa que está adicado ao cine clásico. Todos os días teremos unha película proxectada e ademais, cada semana, haberá unha proxección especial que publicitaremos no local. Ademais, tamén ofrecemos un tipo de música máis alternativa.
-E para tomar, ¿que ofrecedes?
-Ofrecemos chocolates e cafés especiais, cócteles feitos por un especialista e unha selección de cervexas de importación.
-¿Que horario ten?
-Aínda que vai estar aberto todo o día, o groso de eventos será en horario de tarde e de noite, xa que é cando a xente dispón de máis tempo libre para desfrutar das posibilidades de ocio que ofrece a cidade.