a pie de calle «A poesía resulta estraña cando se sae do amor, o erotismo e a paisaxe»

A poeta Estíbaliz Espinosa ofreceu hai dous días un recital multimedia no centro sociocultural da Trisca, incluído dentro do programa letras vivas. A autora recitou os seus poemas co apoio de imaxes e da música.

-¿Os medios audiovisuais non distraen a atención sobre os poemas?

-A intención é xustamente a contraria, non distraer e dicilos doutro xeito. Pero é verdade que a xente queda hipnotizada cando lle pos diante unha pantalla. Neste caso proxectei os meus textos, e non outro tipo de imaxes como fago outras veces, ademais de recitalos e de determe a explicalos de maneira moi didáctica, encadeando con silencios.

-¿O formato varía segundo os públicos posibles?

-Si, porque cando se trata de persoas maiores e sen hábito de ler e escoitar poesía non lle podes por cousas moi experimentais. Ás veces é complicado, porque poden ser textos poéticos máis ou menos herméticos, ou porque o tema non se comprende dentro do que se entende convencionalmente por poesía. Resulta estraña cando se sae do amor, o erotismo ou a paisaxe. Un poema que fala das matemáticas, como o meu Matemáxicas , é raro.

-¿Percebe cambios no público menos afeito despois destes recitais?

-Hai xente que noto que non, que non lle chega. Están ancorados nunha poesía tradicional, e cando non hai rima non lles parece un verso. A poesía sempre ten unha recepción moi ambigua.