a pie de calle «O que me interesa á hora de crear é o proceso, neste caso un espazo vivo»

A artista Rita Rodríguez (A Coruña, 1981) inaugura esta tarde na Zona C, en San Domingos de Bonaval, unha intervención artística que nace a proposta de Ana Justo, alumna do máster de Arte, Museoloxía e Crítica contemporáneas da USC, para o seu proxecto final do postgrao como comisaria de exposicións. No marco da colaboración da Consellaría de Cultura con este curso, a iniciativa foi seleccionada para a súa presentación nesta sala municipal.

-¿Como xurde esta colaboración?

-Chamoume Ana Justo para propoñerme facer un proxecto de intervención que me interesou moito, porque está na liña do meu traballo de creación mediante procesos nos que a xente participe de maneira voluntaria, implicándose, como busco neste caso.

-¿En que consiste?

-A sala está pintada de branco, incluído o chan, e hai papeis brancos para que o público faga trazos en negro como queira ao son da canción Stand by me . Un botón acciona a música e a gravación en vídeo de dous minutos da acción, que se van acumulando e que se poden proxectar nun cuarto ao lado.

-¿Que busca con este proceso en construción?

-Interésame a arte en acción, o proceso como un espazo vivo. Hai cousas controladas, pero o que busco é o inesperado, investigar a reacción da xente. O resultado final non importa como tal. Se as paredes se enchen de negro, perfecto, pero se non, tamén.