Entrevista | Ângelo cristovão DIRECTIVO DA ASOCIACIÓN DE EMPRESARIOS DE PADRÓN que falou no parlamento de portugal «Galicia debe participar na lusofonía con normalidade»

Este padronés foi un dos dous representantes galegos que falou o día 7 na sesión monográfica da Assembleia da República de Portugal sobre o Acordo Ortográfico. «A experiencia foi para nós con normalidade, desde o momento en que a Associaçom Galega da Língua recibiu o convite e nos deu a oportunidade de participar á Associação Pró Academia Galega da Língua Portuguesa, pola que eu interviñen. De feito representamos ao noso país. Sei que algunhas persoas non gustan de escoitar isto; porén, así fomos presentados, e ese foi o tratamento que nos deron nos medios de comunicación».

-¿Que conclusión lle merece esa participación no Parlamento de Portugal?

-Penso que Galicia debe participar na lusofonía con normalidade. O mercado e a lingua dos países lusófonos son unha oportunidade e non unha ameaza para o noso país. Destacaría a normalidade con que nós fomos recibidos, que dá a entender que estamos a un nivel de maturidade para asumir responsabilidades.

-¿Como é iso?

-O reintegracionismo talvez teña pecado durante moito tempo de usar discursos de vitimismo, ao mellor non tiña outro remedio. Estou certo que iso se vai acabar, porque o paso que demos en Lisboa terá repercusións importantes. Xa hai algúns procesos abertos que espero que as autoridades políticas saiban ver e apoiar.

-Hai quen ve como certa clandestinidade na súa presenza en Lisboa...

-Non temos nada que ocultar. Previamente eu mesmo informei ao Goberno galego, e tamén foi informada a Embaixada de España en Portugal. En Lisboa presentamos o movemento cultural lusófono do noso país como un movemento cívico, serio, comprometido e disposto a asumir responsabilidades, como evidencia o texto conxunto lido no Parlamento de Lisboa por Alexandre Banhos, a quen persoalmente lle estou moi agradecido. As entidades lusófonas sempre estaremos dispostas ao diálogo e a colaborar

-¿Que van facer agora?

-Continuará a presenza galega nos foros lusófonos e nós continuaremos a facer o noso papel, coas portas abertas á colaboración de máis entidades e tamén das autoridades políticas, que talvez se sintan interesadas neste proceso de aproximación, en que nós levamos máis de dúas décadas pedindo a presenza galega na comunidade de países de lingua portuguesa. Pedimos entrevistas co presidente da Xunta e coa conselleira da Cultura para os próximos días, e así llo queremos comunicar.

-¿Que pretende a Academia Galega da Lingua Portuguesa?

-Está legalizada a asociación cultural pro-Academia. Somos unha entidade cívica integrada por profesores, escritores, empresarios, avogados, profesionais de diversos ámbitos. Pretendemos actuar con rigor científico e continuidade histórica. Realizamos contactos institucionais no exterior e temos proxectos editoriais, e outros, que se coñecerán nos próximos meses, cando se constitúa a Academia.