A película galega «A nena que tiña unha soa orella», de Álvaro León, triunfou na sección de animación
10 oct 2010 . Actualizado a las 02:00 h.A coprodución lusofrancesa A religiosa portuguesa , de Eugene Green, gañou o gran premio Calpurnia á mellor longametraxe do 15 Festival de Cine Internacional de Ourense. O xurado e o público premiaron 18 comidas , do galego Jorge Coira, filme do que o xurado subliña a «eficacia de afrontar unha tarefa complicada». Esta cinta tamén levou unha das dúas mencións especiais, neste caso ao reparto e equipo «pola brillantez colectiva á hora de fiar os seus compoñentes», sinala o xurado. A outra mención é para Tami I Ovde , coprodución serbia, norteamericana e xermana dirixida por Darko Lungulov.
Nesta edición do festival ourensán foi elixida como mellor actriz de longametraxe Kimke Desart, polo seu traballo en Lost Persons Area . O mellor actor é Dominic Rains, pola súa participación en The Taqwacores . O premio Cidade da Coruña ao mellor guión levouno Taha Karimi, de Irak, pola súa película Kwystani Qandi l, un orixinal tratamento de temas fronteirizos, segundo o xurado. E o galardón ao mellor director foi para o coreano Zhang Lu, por Dooman river . O premio universitario recaeu na cinta Gagma Napiri , de George Ovashvili, de Xeorxia/Kazajstán.
En curtametraxes o gran premio foi para Thermes , do belga Banu Akseki, mentres que o público decidiu premiar Illa Pedra , coprodución galega e británica dirixida por Adriana Páramo. María Tasende, deste filme, levou o galardón á mellor actriz, unha cinta que encarna a morriña e a condición de partida de moitos galegos. O mexicano Jorge Adrián Espíndola é o mellor actor, por Buenas intenciones . E o mellor director en curtas é o belga Daan Van Baelen con Prediker .
Levou mención especial un traballo español, Teen age riot, de Sergi Pérez, e Tulum , do croata Dalibor Matanic.
Animación galega
Na sección de animación o gran premio foi para a película A nena que tiña unha soa orella , do galego Álvaro León. Bob , dos alemáns Jacob Frey e Harry Fast, foi mención especial como metáfora do inalcanzable.
En novos media o premio foi para Home , do italiano Francesco Filippi. En documentais o mais premiado foi Vienen por el oro, vienen por todo , dos arxentinos Pablo Dàlo e Cristian Harbaruk. O s británicos Mark Henderson e Kate Horne teñen o Cidade de Vigo ao mellor director e o público premiou Septiembre del 75 , de Adolfo Dufour.
O premio do Eixo Atlántico gañouno este ano Passeio de domingo , filme de animación do luso José Miguel Ribeiro.