O «Proxecto Galicia» avanza coa presentación da serie de Dereito

O Círculo das Artes de Lugo acolleu onte a presentación da serie dedicada ao Dereito pertencente á iniciativa editorial Proxecto Galicia de Hércules de Ediciones. O obxectivo da mesma é dar a coñecer as orixes e a realidade xurídica galega a través dun método divulgativo e popular, ao alcance do lector común. Nun total de cinco volumes, estúdase toda a extensión e peculiaridades do Dereito galego como unha radiografía da sociedade galega, da súa personalidade e do modo de vida da mesma.

Coordinada polo presidente da Academia Galega de Xurisprudencia e Lexislación, José Antonio García Caridad, a serie engloba, entre outras materias, os principios, as fontes -peculiares e recoñecidas pola Constitución Española-, os dereitos reais, de posesións, de partillas e servidumes, así como o dereito sucesorio.

Durante a súa intervención, García Caridad explicou que, nas súas orixes, o Dereito galego era consuetudinario, é dicir, que «non é un dereito que nace da formalización do poder», senón que, ao igual que o Dereito romano, facíase coa casuística e a partir de aí sacábanse os principios.

O avogado lucense Antonio Díaz Fuentes, que tamén colaborou na obra, iniciou o seu discurso definindo o Dereito galego como unha disciplina «de orixe popular, como un produto do espírito colectivo, como un fenómeno de espontaneidade social». Díaz Fuentes recordou que aínda que Galicia non tivo órganos lexislativos desde o reino suevo ata o actual Parlamento autonómico, o pobo galego foi capaz de crear unhas normas para rexerse a si mesmo, o que lle outorgou o máis alto sinal de cultura a esa sociedade. Así mesmo, Díaz referiuse ao Dereito galego como unha serie de elementos ensamblados dun modo moi peculiar que deron lugar a un dereito concreto. Tamén fixo referencia ao labor dos xuristas, que fixeron un aporte de ciencia xurídica que serviu para que a costume se convertese en norma xurídica a través da xeneralización.

---

---

---