muestra O Museo de Lugo inaugura a maior exposición sobre Castelao

Castelao: A derradeira lección do mestre

é a exposición que se inaugurará mañá e coa que o Museo Provincial de Lugo pretende render a maior homenaxe «ao galego máis importante do século XX», segundo coincidiron en afirmar onte un dos comisarios, Felipe Senén, e Antón Bao, vicepresidente da Deputación, na presentación da mostra. Abarca a etapa final da vida do artista, escritor e político, a do exilio, dende 1936 ata 1950, e poderase ver ata o 10 de xullo.

Ocupa tres salas do museo e inclúe unha programación complementaria moi variada, parte dela dedicada aos estudantes. Os comisarios, Senén e Pilar García Negro, reuniron ducias de gravados, cadros e outras obras de arte, así como multitude de documentos, manuscritos, obxectos persoais e pezas que, pese ao seu número, constitúen unha parte mínima das preto de 4.000 que ten catalogado Miguel Anxo Seixas, segundo destacou Felipe Senén.

A selección feita pretende reflectir o compendio de actividades que desenvolveu, tanto na faceta de debuxante, pintor, caricaturista, ilustrador, xornalista, escritor, pensador como na de político nacionalista. Para iso contaron coa colaboración de preto de vinte institucións e case outros tantos coleccionistas particulares, ademais dos participantes na montaxe.

O obxectivo da mostra é facerlle xustiza «e conxurar unha perniciosa parsimonia, non casual, a que nos leva a demorar de máis no coñecemento da nosa historia e, por tanto, a ignorármonos nós mesmos», dixo o comisario que asistiu á presentación. Referiuse ao paradoxo de que no período que Castelao permaneceu sen poder poñer o pé fisicamente na súa terra, nunca estivo tanto nela.

A mostra, que coincide co ano do 60.º aniversario do pasamento de Rodríguez Castelao, ocupa tres salas do museo lucense. Unha delas está dedicada a proxeccións audiovisuais, na que se mostrarán constantemente imaxes relacionadas con el e gravacións coa súa voz.