A colección de arte do CGAC verase por primeira vez no Marco de Vigo

Concha Pino

CULTURA

A selección de obras a cargo dunha comisaria independente, co título «89 KM», estará aberta todo o verán

03 mar 2010 . Actualizado a las 02:00 h.

A colección do Centro Galego de Arte Contemporánea (CGAC) viaxa por primeira vez ao Marco de Vigo. A exposición, que figura na programación deste ano do CGAC, é unha produción do Museo de Arte Contemporánea de Vigo, onde estará aberta todo o verán, dende o 4 de xuño ao 19 de setembro. O número de pezas da colección do CGAC é dunhas mil, pero ao museo vigués viaxará só unha selección, unha proposta na que traballa Virginia Torrente, comisaria independente, que incluirá a artistas galegos e tamén obras en depósito no centro de arte compostelán como son as da Colección Fundación Arco. A exposición vai ser moi ampla, porque como explicou o director do Museo de Arte Contemporánea de Vigo, Iñaqui Martínez, vai ocupar toda a planta baixa do centro. O discurso da montaxe ofrecerá unha visión nova desta colección pública, pero o que é seguro xa é o título co que se vai presentar: 89 KM. Colección CGAC , en alusión á distancia en quilómetros entre Compostela e Vigo. O Marco non ten colección propia, polo que non hai unha contrapartida expositiva. Trátase de mostrar á poboación de Galicia, neste caso no Sur, a colección de arte institucional, na que figuran relevantes artistas contemporáneos do panorama internacional. Virginia Torrente foi xefa da colección e de exposicións do Museo Patio Herreriano de Valladolid entre o 2000 e o 2003, e responsable de artes plásticas da Casa de América de Madrid entre o 2004 e o 2006, para a que desenvolveu un programa de exposicións individuais de artistas españois, portugueses e suramericanos. Como comisaria independente desenvolve unha intensa actividade. Un dos seus últimos proxectos, Paraísos indómitos , estivo no 2008 no Marco de Vigo.