Alberto Núñez Feijoo entrou onte no CGAC por primeira vez como presidente da Xunta anunciando que acudirá máis veces e asegurando que por primeira vez na «historia do centro os especialistas decidiron o nome mellor para a dirección, e nós acatamos esa decisión». Feijoo decidiu comparar a Miguel von Hafe con «fichaxes doutras institucións, como Figo ou Cristiano Ronaldo» na presentación do novo director, para quen as primeiras mostras do seu labor comezarán a verse no primeiro mes do 2010, aínda que lle gustaría «ter un pouco máis de tempo, oito meses estaría ben, pero non vai poder ser».
-O CGAC arrastra problemas laborais dende hai anos. ¿Vanse solventar? ¿Afectarán á conformación do seu equipo?
-Tres palabras para iso. Motivación, motivación, motivación. Un equipo ten que estar motivado para o traballo. Ten que gustar do que fai. Non teño coñecemento exacto da situación porque aínda non tomei posesión, pero creo que se traballan aquí é que gustan da arte, e se gustan da arte traballan nun contexto específico no que hai que encontrar a competencia desas persoas para cada un dos cometidos. Cando se ten claro o que se quere conseguir pódense facer moitas cousas por riba dos problemas burocráticos, que ás veces poden ser moi perniciosos nas relacións dos equipos.
-¿Cales serán as primeiras mostras da súa dirección?
-Hai dous condicionantes que temos que converter en positivos. Temos premura de tempo e hai que estar á altura do Xacobeo. Polo tanto as primeiras exposicións serán mostras que están xa en circulación ou que se estean producindo porque non hai tempo para producilas. Debemos ter para o ano próximo unha programación moi forte e de carácter internacional. Haberá producións propias, pero serán contra o final do 2010. O que si podo dicir é que esa programación pasa por repasar a obra dos autores seminais da arte contemporánea nos últimos trinta anos.