Unha hora despois de ser nomeado, Miguel von Hafe Pérez aseguraba que era «unha altísima responsabilidade ser director do Centro Galego de Arte Contemporánea» e lembraba que ser «elixido por un comité de nomes como os que formaban parte do reunido pola Xunta é un orgullo para calquera que se dedique á arte contemporánea».
Von Hafe, que xa colaborou en algunhas actividades do CGAC anos atrás, confirmou que o proxecto que presentou para o seu labor como director do centro podía ser considerado de carácter museístico. Segundo Hafe a intención é «elaborar un programa de exposicións como un dos argumentos fundamentais do centro». A outra liña que o recén nomeado director apuntou como fundamental é «o traballo coa colección que ten o centro».
Aprender galego
O novo director asegurou que cumpriría no prazo máis breve co seu traslado a Compostela e que, dende aquí, explicaría o seu proxecto de maneira máis detallada. O conselleiro sinalou tamén que o novo director debería aprender galego no prazo dun ano «aínda que sendo portugués non creo que teña problema». Varela explicou que a súa orixe en Porto e a súa relación con Galicia impedían que «se fale del como un candidato de fóra». O conselleiro sinalou que Von Hafe «terá que asumir en parte o traballo de transformación que ten que realizar o CGAC para o seu novo estatus xurídico».