O autor ven de publicar na editorial Biblos a primeira guía sobre autocaravanas, na que abondan consellos para iniciados
30 may 2014 . Actualizado a las 07:00 h.A editorial Biblos ven de sacar ao mercado estes días La guía de las autocaravanas, escrita polo profesor universitario, escritor e autocaravanista Xosé Manuel Sarille, un home que leva nas veas o turismo tranquilo. Sarille percorre a historia deste movemento coetáneo do cine que naceu espontáneamente nas dúas beiras do Atlántico, froito de adaptar un automóbil para vivir ou durmir nel.
-¿Cómo xurdiu un libro así?
-Fun campista desde os 6 anos e engancheime de contado ás autocaravanas. Comparo o tema co dos moteiros, co que temos puntos en común, case de tribo. Os autocaravanistas saudámonos cando imos pola estrada. E así naceu a idea de crear una guía que en Galicia non existía.
-¿Son caras as autocaravanas?
-É un automóbil caro, pero ten un abano de posibilidades enorme. Non é un coche para 8 anos pois dura máis. É un investimento a longo prazo. E aforras en hoteis. Hainas no mercado de segunda man moi asequibles. Chamámoslles «yates da estrada» pola similitude de poder botar a áncora en calquera sitio. Ser autocaravanista ten un punto de errante.
-Pero para disfrutar deste turismo necesítase moito tempo libre
-Algo de razón hai. Quen viaxa deste xeito ten idades altas, xubilados ou profesores, aínda que atopas de todo e medra. De feito, en España hai censados 40.000 autocaravanistas e na Asociación Galega, que conta cunha interesante páxina web, chegamos aos 400 socios.
-¿Necesítase un carné ou psicotécnico especial para conducilas?
-Non, como calquera outro turismo xa que o vehículo non pasa dos 3.000 kilos. Eso sí, hai que ter en conta que é máis lento, que ten maior altura ou que inflúe moito na conducción o vento.
-Merco unha autocaravana, pero ¿onde a gardo?
-Hai xente que as garda nas leiras ou nas casas. Agora xa funcionan naves ou antigas granxas reconvertidas en aparcadoiros.
-¿Qué consellos lle daría a alguén que se quere iniciar?
-O primeiro é que se un non é viaxeiro non vale. Hai que e dispoñer dun espírito aventureiro.
-Un usuario de autocaravanas, ¿cómo entende o turismo?
-Temos un punto ecolóxico e de conciencia. Turísticamente os usuarios teñen un poder adquisitivo medio-alto e gastan máis que un turista común.
-¿Está preparada Galicia para recibir autocaravanistas?
-Deberiamos poñernos as pilas porque hai paisaxe e posibilidades de atraer turismo que deixa cartos. De todos os xeitos, avanzouse. En Galicia xa temos máis de 70 áreas de pernocta.