O candidato de Ciudadanos en Cee ofrece «un partido totalmente novo» e asegura que non pactará cos que teñan imputados
25 abr 2015 . Actualizado a las 05:00 h.Plácido García Insua (Cee, 1945), navieiro xubilado e membro do goberno local con Ramón Vigo, do que se afastou a raíz da polémica da fábrica de tubos, encabeza agora a única candidatura de Ciudadanos na Costa da Morte.
-¿Como conseguiron a candidatura?
-Foi unha auténtica loita, pero eu tiña moitísimo interese, xuntei xente e chamei un montón de veces a Barcelona e tamén á dirección galega ata que o 13 de marzo, día da inauguración da Casa da Cultura, nos deron o visto bo. Para nós é un logro porque somos un dos primeiros pobos de España que ten unha candidatura de Ciudadanos.
-¿Con qué perspectivas parten?
-Se se cumpre o ambiente que hai na rúa as perspectivas son marabillosas, porque é un partido que non ten inimigos e que cae ben. Ademais fai propostas totalmente razoables, que é o mesmo que imos aplicar en Cee: austeridade, honestidade e transparencia. Penso que a Cee tócalle vivir unha nova época. A vella política está desaparecendo e é normal porque abres o xornal e as tres primeira follas son todos os días casos de corrupción. A sociedade non o pode permitir. É unha vergoña.
-¿Que diferenzas marca co partido de Ramón Vigo, do que formaba parte?
-Non me gusta falar dos outros partidos. Nós as decisións que tomamos facémolo todos os candidatos xuntos. Tanto valgo eu como o que vai de último.
-¿Como valora o goberno do PP?
-Penso que puido ter feito máis cousas. Tivo tamén algún acerto pero debeu aproveitar mellor o tempo. En calquera caso non son eu o que ten que valorar a Zaira e ao seu equipo. É o pobo quen pode facelo e se nos vota a nós, pois mira que ben.
-¿Que lle parece o das sete candidaturas?
-Mal. Sete candidaturas son moitas, pero demostra que as cousas ás veces van en contra do que opinamos, porque se di que a xente está desencantada coa política, parece que en Cee hai certas inquedanzas.
-¿Pactaría con outro grupo?
-Non sabemos se fará falta pero estamos abertos. Con que non podemos pactar e cos grupos que teñan xente imputada.
-¿Cales son os seus obxectivos?
-A vía que una o polígono co porto de Brens, e recuperar o casco vello comercialmente. Para iso imos trasladar alí algúns dos servizos municipais, porque o C3M parece que antes ou despois será do Concello de Cee e no actual Axuntamento faremos a residencia porque os vellos de Cee temos a desgraza de acabar en residencias de fóra. Nas parroquias imos recuperar ao alcalde de barrio. É fundamental e tamén que algún de nós nos acheguemos a elas.
¿A favor ou en contra?
Sanidade para inmigrantes: A favor
IVE cultural no 21 %: Hai que baixalo
Cadea perpetua revisable: Non me fai graza
Xustiza gratuíta: Fai falta
Fusión con outro concello: A favor
Mancomunidade de servizos: A favor
Aborto: A favor
Legalización das drogas: Evitaría os trapicheos
Imputados nas listas: É delicado. Non debera habelos
Legalización da prostitución: En caso de habela, regulada
Preferencias
¿A que hora se ergue? Ás seis e cuarto estou camiñando
¿Que almorza? Café con leite, zume e torrada
Prato preferido: Moitos: peixe, carne,...
Bebida preferida: Bebo auga
Non comería... Xa comín can na China así que...
Equipo de fútbol: Son socio do Cee de sempre
¿Que coche ten? Un Audi Quatrro con 12 anos
Unha afección: Camiñar moito e a horta
Un lugar: Cee
Unha rede social: Estou no Facebook
Artes e letras
Escritor favorito: Reverte
O último libro que liu: Foi un de Pérez Reverte
A última película que viu: Mar Adentro
Un artista: ...
Un actor: Javier Bardem
Unha actriz: A súa muller, Penélope Cruz
Un cantante: Supertramp, Julio Iglesias
Tipo de música: Instrumental,... De todo
Programa de TV: O debate de Vía V, entre outros
Unha viaxe pendente: Gustaríame volver a Holanda