crónica ¿Qué pasa coas pasarelas?

A Unión de asociacións veciñais e culturais de Lugo (Unave) solicitou entrevistarse con representantes do Concello para coñecer a situación actual das peticións que este colectivo realizou no verán pasado en relación cunha serie de obras, algunhas das cales consideran desde este colectivo que deberían executarse este ano.

Desde Unave cren necesario que se solucionen os trámites burocráticos que impiden acometer unha obra tan demorada como a pasarela do río Miño á altura do Club Fluvial. Tamén se interesan pola situación do estudo do Ministerio de Fomento para acometer a pasarela sobre a N-VI á altura do estadio Ángel Carro para comunicar ambas marxes da estrada, facilitando así as saídas e entradas do recinto feiral e dos acontecementos deportivos.

No apartado de obras, as peticións destas asociacións refírense ao asfaltado de pistas en Orbazai e na zona As Regas-Carballido; o arranxo xeneralizado do mercado de Fingoi; o soterramento dun transformador eléctrico en mal estado de conservación na rúa Carpazas; a renovación de beirarrúas no grupo La Paz e a limpeza e mellora de xardíns; a construción de beirarrúas, iluminación e rebacheo en distintas zonas do barrio das Gándaras, como Camiño de Romai e rúas San Xosé e Torre de Doncos; e a eliminación de tapóns urbanísticos na rúa Sanxillao.

Piscina e zona de baño

Unave demanda por outra parte a creación dunha piscina municipal na zona sur da cidade, xa que unicamente existe a do parque de Frigsa, na zona norte da cidade. De cara á temporada de verán, desde Unave consideran prioritario acometer o acondicionamento dunha zona de baño no paseo do Miño, máis ou menos á altura da pasarela que atravesa a N-VI, o cal facilitaría o disfrute a moitos veciños  que utilizan este paseo na época estival.

Polo que respecta á paralización da aprobación do Regulamento de participación cidadá, estancado principalmente pola elección de pedáneos, e solicitada maioritariamente na comisión que estuda o borrador e non aceptada polo equipo de goberno, o presidente de Unave, Valentín Arias entende que «debe ter unha vía de saída procedendo a elixir representantes dos veciños diante do alcalde nos sitios onde non exista unha asociación veciñal representativa. Parécenos lamentable que a Ley de grandes ciudades, que entre outros temas facilita a creación de distritos  e órganos de representación veciñal nos mesmos, con orzamento propio, estea practicamente paralizada por este motivo».