No castro de Viladonga darán comezo mañá novas escavacións que darán continuidades aos traballos que se veñen desenvolvendo neste espazo de xeito ininterrompido dende o ano 2004. As actuacións continuarán durante máis de catro meses e estarán centradas fundamentalmente en dúas zonas do castro: a croa e un dos barrios centrais.
Neste segundo caso trátase dunha actuación de grande envergadura, xa que se vai proceder a consolidación completa dun barrio. O novidoso dos traballos é que en anteriores ocasións só se acometeran consolidacións parciais, que afectaban soamente a estruturas, mentres que neste caso vaise abarcar unha zona moito máis ampla.
Este será o primeiro paso de cara a posteriores escavacións que tamén irán encamiñadas ao asentamento de barrios enteiros. Trátase de traballos que dende a dirección do museo de Viladonga consideran necesarios para o mantemento e a conservación deste castro.
As actuacións previstas, que contan co financiamento da Consellería de Cultura, levaraas a cabo a empresa BIC que xa realizou traballos no castro de Viladonga en anteriores campañas. Nesta ocasión non terá lugar ningún campo de traballo durante o período estival, como si acontecera noutras fases das escavacións.
Anteriores resultados
Os últimos traballos levados a cabo no castro de Viladonga estiveron centrados no sector da muralla e da croa e permitiron novidosos resultados. No caso da croa, proseguiu a exhumación da vivenda atopada no 2006, que presenta unha tipoloxía rectangular de esquinas redondeadas. Esta tarefa permitiu recuperar máis dunha decena de bronces, tres anacos de vidro e algún fragmento cerámico.
O material arqueolóxico recuperado co derrubamento das paredes internas da vivenda está composto basicamente de terra sigillata , cerámica común, vidros de diferentes calidades e un total de 295 numismas de bronce. O pequeno tesouro desta construción acompáñase con parte dun cacharro. Neste sector quedou definido o camiño interior cara á ronda esquerda da croa, entre a nova construción exhumada e unha vivenda con vestíbulo que se está rematando de escavar.
Polo que respecta á área da muralla quedaron definidos ao longo de dez metros os paramentos internos dos muros que flanquean o acceso ao interior do recinto habitacional. Neste caso recuperáronse dous novos couzóns dunha nova porta, cunha peza lítica central circular cun rebaixe para encaixar un rastrel. Entre o material recuperado tamén se atopan cravos de ferros, parte dun muíño, anacos de tella e dous fragmentos de terra sigillata.