crónica Camiñada poética no Courel

Unha camiñada desde a ferrería de Seoane do Courel ata Parada de Moreda, a aldea natal de Uxío Novoneyra, homenaxeará ao poeta o próximo 9 de maio nunha iniciativa organizada á marxe dos actos oficiais que se celebrarán con motivo do próximo Día das Letras Galegas. A marcha é promovida polo mesmo grupo de admiradores que crearon hai dous anos a páxina web Uxionovoneyra.com, na que se recolleron sinaturas para pedir que o 17 de maio deste ano fose dedicado ao poeta courelao.

Os participantes concentraranse na ferrería ás once da mañá e desde alí camiñarán ata Parada, nun traxecto de tres quilómetros. Ao longo do percorrido faranse varias paradas nas que se recitarán poemas de Novoneyra. En torno á unha da tarde celebrarase un acto de homenaxe xunto á casa natal poeta no que haberá varias actuacións musicais e no que se ofrecerá a oportunidade de falar a todos os participantes que o desexen. Para poder pronunciar unha alocución é preciso inscribirse previamente nunha lista a través do correo electrónico uxionovoneyra@gmail.com. Os organizadores sinalan que é imprescindible apuntarse a fin de «distribuír os tempos en función das persoas que desexen evocar a persoa e a obra de Uxío Novoneyra». Para participar no recital poético que se levará a cabo durante a camiñata, polo contrario, non será necesario facer ningunha inscripción.

Ofrenda floral

Os actos terminarán sobre as tres da tarde cunha ofrenda floral diante da casa de Uxío Novoneyra, a cargo dun grupo de escolares do Courel. Seguidamente haberá unha comida campestre no souto da aldea. Os organizadores sinalan que cada participante deberá levar a súa comida e bebida, xa que en Parada non hai ningún establecemento onde se poidan adquirir.

Na organización desta xornada colaboran o Concello do Courel e a agrupación local de Protección Civil. Os membros desta agrupación axudarán aos participantes a estacionar os automóbiles nos arredores da ferrería. A Parada non se pode ir en coche, xa que alí só hai espazo para aparcar os vehículos dos veciños da aldea.

Os organizadores recomendan a todos as persoas interesadas en participar na marcha que teñan en conta as condicións meteorolóxicas que poidan darse na serra durante a xornada. Aconsellan levar paraugas e chuvasqueiros, pero tamén ir preparados por se o día fose de moito calor.

A páxina web creada no seu día polos promotores da homenaxe continúa activa e anuncia tamén outros actos en memoria de Novoneyra, como unha exposición fotográficaque será inaugurada o sábado -ás 19.30 horas- no Centro Galego de Barcelona.