crónica Historia local en feminino

A área da muller da executiva comarcal do BNG recopila materiais gráficos e documentos sobre «os traballos e a vida da mulleres» nas comarcas de Lemos, Chantada e Quiroga, co obxectivo de preparar unha exposición histórica. A formación pediu a colaboración da cidadanía para recoller todo tipo de imaxes antigas que reflictan os diversos aspectos da vida da muller neste territorio.

Unha parte dos materiais recopilados ata agora dentro desta iniciativa pode verse xa na web Mulleresentresileminho.blogspot.com, que tamén é utilizada para divulgar estes documentos. Neste sitio móstranse, entre outros materiais, dúas fotografías de Maruja Vázquez Suárez, unha mestra natural da parroquia soberina de Vilaescura que foi asasinada en Pontedeume en agosto de 1936 pola súa ideoloxía republicana e o seu activismo político.

Masona e abadesa

A páxina inclúe tamén notas históricas sobre Juana Díaz Ferrer -unha monfortina de finais do século XIX que para algúns historiadores foi a primeira muller do mundo afiliada a unha organización masónica- e a abadesa Constanza Vázquez, que a principios do século XVI dirixiu o convento soberino de Lobios.

Os documentos recollidos dentro desta iniciativa, porén, non se limitan a personaxes de especial relevancia histórica, senón que tamén inclúen imaxes variadas da vida cotiá que mostran a mulleres traballando como panadeiras ou como enfermeiras, vivindo na emigración ou posando en tradicionais fotos de estudo.

O proxecto foi presentado onte pola responsable comarcal do BNG Alicia Cadarso, quen anunciou por outro lado que a súa formación presentará mocións en todos os concellos galegos para pedir á Xunta que elabore un plano de emprego para as mulleres. A formación pide tamén que se organicen actos en memoria de Rosalía de Castro con motivo do 125 aniversario da súa morte.