Alianza de cine e cómic

A curtametraxe O labirinto ario , realizado pola produtora Chantada Films e rodado en boa parte no pazo monfortino de Tor, xa ten cartel oficial. O traballo foi realizado polo artista murciano Pedro Vera, debuxante de cómics e colaborador habitual da célebre revista satírica El Jueves , e desde o luns está a disposición dos responsables deste proxecto cinematográfico.

A colaboración de Pedro Vera foi solicitada polo chantadino Alfredo Pardo, director do filme, que segue regularmente o traballo deste artista. «Sinto moita afinidade coa súa obra e coa súa maneira de ver a vida e por iso decidín pedirlle que nos deseñase o cartel», explica. «Envieille o guión da película, gustoulle e accedeu a facernos ese traballo, poñendo como única condición que non lle metésemos presa», agrega.

Volver á tradición

Pardo é partidario de recuperar a vella tradición de anunciar os filmes con carteis debuxados, que ao seu parecer «resultan moito máis atractivos que as fotografías retocadas co ordenador». Para a anterior película de Chantada Films, Punto e final , contou coa axuda de Nazario Luque, outro debuxante de cómics cuxa obra foi divulgada sobre todo pola desaparecida revista El Víbora . «Parecéme adecuado que os letreiros sexan de debuxantes de cómics, porque son medios de expresión con moitas similitudes», comenta.

O cartel de Pedro Vera acompañará a estrea do filme en Chantada, que se celebrará no telecentro local o 4 de xullo, ás seis da tarde, e as presentacións nos diversos festivais de cine aos que será enviado O labirinto ario . Un deles será o Filminho, que se celebrará en xullo en Tomiño e a localidade portuguesa de Vila Nova da Cerveira. A película, que se subtitulará en castelán e inglés para favorecer a súa difusión fóra de Galicia, será editada tamén en deuvedé.