a pie de calle «Quero reflectir o abandono das aldeas nun filme de ficción»

O realizador televisivo David López dirixiu no 2006 a súa primeira curtametraxe, Empantanados , filmada en terras de Chantada, que chamou a atención en diversos festivais. Esta fin de semana rodará a súa segunda película, As almas do Fental , que incide na temática do abandono do medio rural galego.

-¿Esta segunda película será unha continuación da primeira?

-Teñen cousas en común, pero esta será bastante diferente. Empantanados falaba das aldeas que desapareceron cando se construíron os grandes encoros. Este novo filme terá un só personaxe, o último habitante dunha aldea que quedou sen veciños, como están quedando abandonados hoxe tantos lugares. Eu veño do mundo rural e preocúpame esta situación.

-¿A filmación farase nunha verdadeira aldea deshabitada?

-Non. A rodaxe será nunha aldea da ribeira de Chantada e a historia sucede nunha aldea imaxinaria chamada O Fental, que representará as verdadeiras aldeas galegas que se quedan vacías. Quixen reflectir o abandono das aldeas nun filme de ficción, porque ata agora non se fixeron en Galicia películas sobre este asunto, aínda que hai algún documental. Eu puxen a idea xeral e o guión escribiuno Elena dos Santos, que é de Pantón.

-¿Pensa seguir facendo cine?

-Teño incluso o proxecto de facer unha longametraxe, aínda que non sei se será posible. Pero teño moi claroque quero seguir rodando curtas.