Cine, música, letras e estrelas en Tor

O pazo monfortino de Tor, dependente do Museo Provincial de Lugo, acollerá desde o venres ata o luns unha serie de actividades que servirán para conmemorar ao mesmo tempo o Día das Letras Galega, o Día Internacional dos Museos e o Ano Internacional de Astronomía. O programa de actos non se desenvolverá unicamente no pazo, senón que tamén incluirá un itinerario cultural pola provincia.

As actividades comezarán o sábado ás catro da tarde, cunha visita guiada polo histórico pazo. Ás 18 horas ofrecerase unha sesión de contacontos a cargo do coñecido actor Cándido Pazó, baixo o título O espectáculo da palabra . Ás nove da noite celebrarase a preestrea da curtametraxe O labirinto ario , producida pola firma Chantada Films e dirixido por Alfredo Pardo, que foi rodada o pasado ano no pazo monfortino e noutras localizacións do sur lucense.

Unha hora máis tarde presentarase Nai , o primeiro disco do músico fonsagradino Xoán Curiel, que combina o uso do galego con ritmos étnicos de todo o mundo. Seguidamente, sobre as dez da noite, comezará un obradoiro de observación do ceo nocturno que será dirixido por Francisco García, membro da Agrupación Astronómica Lucense. Esta última actividade dependerá en grande medida das condicións meteorolóxicas que se rexistren a esas horas.

O domingo, por outro lado, os visitantes do pazo serán obsequiados con libros e poderán participar nun percorrido guiado en autocar que discorrerá polo Museo Provincial, o museo da fortaleza de San Paio de Narla (Friol) e o Museo do Mar de Cervo. A saída será ás nove da mañá e retorno, arredor de doce horas despois. Os participantes só deberán abonar a comida -que se fará en San Cibrao- e deberán inscribirse previamente chamando ao teléfono 982????165????534. O número de prazas ara a viaxe, loxicamente, é limitado.