Robótica e leite para que os nenos descubran a ciencia

Medio cento de alumnos de quinto de Primaria do colexio lucense Maristas A Inmaculada foron onte os primeiros en descubrir o labor investigador da Aula de Produtos Lácteos dentro do proxecto Ga-láctica e no marco dunha nova edición da Semana da Ciencia. Despois deles pasaron polas instalacións do citado centro os escolares do CEIP A?????Ponte.

Ademais de coñecer a actividade investigadora da citada Aula, os escolares puideron degustar algúns produtos lácteos e coñecer así as características de cada un. Por outra banda, durante a súa estancia na planta piloto coa que conta o centro puideron coñecer en vivo e en directo o funcionamento das diferentes tecnoloxías que se empregan para a elaboración dos distintos produtos lácteos. Eles mesmos foron quen de preparar algún.

Con pezas de Lego

Noutro punto da cidade, concretamente nas aulas do parque infantil de tráfico, outros estudantes, estes procedentes de colexios e institutos das catro provincias galegas, empezaron a familiarizarse coa linguaxe da robótica e a participar en pequenos grupos na montaxe e programación dun robot móbil empregando para iso unha serie de pezas de Lego.

Ademais de divertirse e de pasalo ben, que de iso ten moito este obradoiro, os alumnos enfróntanse a unha serie de desafíos. Se conseguen superalos é posible incluso que obteñan unha recompensa, xa que os proxectos que leven a cabo poden ser premiados no concurso galego de robótica.

En calquera caso, o milleiro de escolares que pasarán por este obradoiro, que tamén forma parte da Semana da Ciencia, veñen dispostos a demostrar que saben traballar en equipo e resolver problemas científicos.