O Balonmán Deza segue sen collerlle o ritmo a esta tempada ligueira, e a pasada fin de semana sucumbiu 20-28 no seu terceiro encontro de Liga. O Seis do Nadal marchouse do Municipal con dous puntos logo de superar a un Deza fallón nos lanzamentos e que recibiu 11 exclusións. Ata en tres ocasións o cadro local só tivo catro xogadores de campo sobre a pista, circunstancia que o Seis do Nadal aproveitou para ir sacando no segundo tempo as vantaxes que á postre lle darían a vitoria.
Na primeira metade o Deza defendeu forte, pero non ofreceu o mesmo rendemento en ataque, onde apenas asinou contras. Ao descanso o marcador recollía un 11-13 ao que os locais non lle deron dado a volta por mor das exclusións. O cadro lalinense segue sen sumar puntos na táboa, e sitúase colista logo das tres primeiras xornadas de Liga.