Soledad Santos ten 45 anos e leva cinco como responsable das festas de San Ramón de Vigo e Mallas, en San Martiño de Duio (Fisterra).
-¿Por que celebran tan tarde a San Ramón?
-Sempre se fai na fin de semana seguinte ao 31 de xullo, salvo que caia en sábado. É unha tradición de moitos anos, disque un ano morrera o da comisión o día da festa e quedou para o seguinte.
-¿É unha festa grande?
-Cando as recuperamos apenas xuntabamos 3.000 euros, hoxe a cousa xa está moito mellor. Pero custa moito. Ata imos dous días ao longueirón para axudar a pagalas. E tamén temos a taberna, pedimos polas portas (son unhas 50 casas, entre Vigo e Mallas), vendemos lotería e rifas para ir a un balneario.
-Quen o pillara, porque se han de cansar moito.
-Si, é que isto dá moito traballo,. Temos xente que colabora, pero as que realmente traballamos somos miña prima Xunqueira e eu. Por certo que a ela vaille tocar coller o relevo.
-¿Que temos para a xornada de hoxe?
-Hoxe é o último día e xa non hai baile. O do venres rematou onte ás 9.00 da mañá. Hoxe é o día do neno, haberá inchables pola tarde.