Moito distou onte a participación real de Amegrove-Interrías na clasificatoria da Bandera de La Concha da regata imaxinada polos remeiros da bancada amarela nos catro días que transcorreron desde a celebración do título de campións da Liga Galega de Traíñas. Porque unha cousa é morrer coas botas postas, e outra moi diferente quedarse fóra da final da cita máis prestixiosa do remo español tras ofrecer unhas prestacións tan por debaixo do que ten amosado Amegrove na presente tempada. A consecuencia, un decimosexto posto na contrarreloxio de San Sebastián, cun crono de 20.57.60, a 41 segundos do sétimo e derradeiro clasificado para a final de La Concha. Tal e como se prevía, os representantes da Liga ACT coparon as prazas en xogo, con Koxtape facendo unha auténtica exhibición.
A regularidade foi o santo e seña da traíña adestrada por José Cambados na LGT, e nela sustentou o seu triunfo na xeral. Pero cando menos presión debía sentir a tripulación arousá, cando tan só se trataba de dar o máximo polo puro pracer de remar na catedral das traíñas, Amegrove perdeu o favor da súa musa.
O técnico e remeiro do barco mexilloeiro relataba onte ao termo da clasificatoria que «estivemos fatal. No primeiro longo xa iamos mal, a 10 segundos do terceiro» cun crono de 10.59 -na Concha o campo de regatas está disposto para dous únicos longos-. Remabamos sen forza. Ata Chapela», que rematou quinta na LGT, «nos superou».
Cambados non acerta a explicarse o que aconteceu. «Non sei se foron os nervios, ou que», o único que sabe é que se vogou «sen forza. Non tivemos o día».
A palabra decepción non aparece na valoración do responsable da traíña grovense, pero si recoñece que «nos queda un mal sabor de boca». E é que José Cambados está convencido de que «se fixeramos a nosa regata podiamos estar entre os sete primeiros». Os que disputarán a fase final da Bandera de La Concha xunto coa embarcación local Donostiarra en función dos seguintes tempos: 1º Koxtape (19.41.62), 2º Orio (19.57.72), 3º Kaiku (20.02.90), 4º Urdaibai (20.03.18), 5º Hondarribia (20.06.66), 6º Astillero (20.06.98), 7º Pedreña (20.16.32), 8º San Pedro (20.21.94), 9º Catro Urdiales (20.24.34), 10º Camargo (20.31.10), 11º Chapela (20.40.40), 12º Tirán (20.40.54), 13º Zumaia (20.44.86), 14º Isuntza (20.45.46), 15º Santurtzi (20.51.78), 16º Amegrove (20.57.60) , 17º Zarautz (21.00.18), 18º Zierbena (21.09.82), 19º Samertolameu (21.22.50), 20º Deusto (21.44.78), 21º Getaria (21.48.82), 22º Trintxerpe (22.14.62), 23º Hibaika (22.22.16) e 24º Luanco (22.56.76).
José Cambados pretendía facer da Bandera de La Concha un bo test co que ver as posibilidades de ascenso á ACT no vindeiro play-off, ao atoparse en San Sebastián cos seus catro rivais nas citas dos días 18, en Bermeo, e 19, en Portugalete. Na primeira delas, cando menos, coa mesma modalidade de contrarreloxio como sistema de competición.
Da Concha o técnico de Amegrove sae coa conclusión de que «os nosos rivais están fortes. Tanto ou máis ca nós». De feito a traíña arousá só foi quen de superar onte a Samertolameu, por 25 segundos, quedando a 26 de Camargo, 12 de Zumaia e 5 de Santurtzi. Haberá que ver se o baixón de Amegrove coincidíu cun bo día dos seus adversarios.