Os amantes do fútbol afeccionado en Arousa non poderán queixarse hoxe da oferta que se lles ofrece. Se na Terceira División o Vilalonga se mide no Novo San Pedro o terceiro clasificado, o Narón, na Preferente Sur o Ribadumia protagoniza o derbi da xornada exercendo de David fronte ao Goliat Portonovo (A Senra, 17 horas) . O decimocuarto clasificado (34 puntos) enfróntase ao ata o día de hoxe segundo mellor conxunto da Liga (48). Ao seu favor, o Ribadumia conta co aparente baixón do rendemento do Portonovo fóra da súa casa, logo de caer nos seus últimos dous desprazamentos. Nos dous, ante rivais teoricamente asequibles: Rápido Bahía (1-0) e Marín (3-1). O 7-0 co que o cadro de Sanxenxo se resarcíu a semana pasada desta última derrota eleva nembargante as alertas nas filas locais. O adestrador do Ribadumia, Carducho, explicaba onte que o seu equipo buscará a vitoria fiel aos seu principios, a través dun fútbol de contragolpe que explote a velocidade dos seus homes de banda e as segunda chegadas. Para conseguilo antes terá que gañarlle a partida no centro do campo ao Portonovo. E con tal fin o Ribadumia traballou esta semana un sistema de axudas sobre os tres homes clave do xogo contrario, Óscar Guimeráns, Nacho e Comesaña. O empate a uns da primeira volta anima a pensar entre os de Carducho en que un bo resultado é posible. Iván e Álex son baixa por lesión, e Joao Rocha por decisión técnica.