Quere deixar atrás nove anos de polémicas, por iso di que parte de cero na súa andaina como responsable policial. Iso si, chega a Cambados cargado de ilusión
01 dic 2009 . Actualizado a las 02:00 h.Ten 42 anos e leva 22 prestando servizos como policía local en Ourense, onde viviu toda a súa vida. Aínda que hai unha década nada o vencellaba a Cambados, todos na vila saben ben quen é Maxi, que un día se presentou ás oposicións para sarxento da Policía Local e que loitou nos xulgados sen descanso ata que acadou a praza que sempre pensou que lle correspondía. O culebrón durou tanto que agora, a piques de tomar posesión do cargo, Diz Ferro xa non quere falar máis do pasado. Borrón e conta nova.
-Os xulgados sempre lle deron a razón. É de supoñer que vostede crerá na xustiza.
-Eu loitei duro polo que considero xusto, e claro que creo na xustiza, todos os cidadáns debemos confiar na xustiza.
-¿E que foi o que lle dou forzas para enfrontarse unha e outra vez ao Concello?
-A paciencia e os valores que teño interiorizados e nos que creo e que agora vou tratar de transmitir: a tolerancia, a solidaridade, o respecto... Son valores que todos deberían ter interiorizados, e máis nun servizo público como a Policía Local.
-Aínda ven de pedir a excedencia en Ourense. ¿Que sabe das funcións que lle esperan en Cambados?
-A verdade é que parto de cero en todos os aspectos, porque aínda descoñezo o tecido social de Cambados, pero o fago con moita ilusión e coa intención de contribuír a aumentar a calidade dun servizo público, que iso é o que é a Policía Local.
-¿Coñece á plantilla?
-Á gran maioría non os coñezo, pero como fixen sempre, poñerei en práctica a arte de saber escoitar. Escoitarei aos compañeiros, aos veciños, aos empresarios, aos representantes das asociacións... E aprenderei deles.
-Con algún deles tivo un conflito hai anos, cando denunciou que se filtraran os contidos dunha proba da oposición.
-Eu non acusei a ninguén, o que pedín foi que se investigara se houbera algunha filtración do exame. Pero iso xa está superado. Eu hoxe -por onte- vin a Cambados para falar co alcalde en clave de futuro.
-Logo de 22 anos en Ourense, ¿costoulle despedirse dos seus compañeiros?
-Recoñezo que é unha situación agridulce, porque estou contento pola miña mellora profesional pero deixo alí compañeiros aos que lle teño un gran aprecio. Foron anos moi interesantes nos que tiven a oportunidade de estar na rúa para coñecer aos cidadáns, a xentes de diferentes culturas, traballei cos discapacitados, con asociacións culturais e veciñais... Estou nunha oenexé que traballa con inmigrantes, con discapacitados, con xitanos... Unha vez fixen un curso de linguaxe de signos, e o ano pasado tiven que socorrer a unha persoa xorda nun accidente de tráfico. Fun quen de comunicarme con ela e iso foi unha experiencia moi interesante. Iso é o que quero facer en Cambados, chegar a todos os colectivos.
-¿Esa é a idea que quere transmitir da Policía Local?
-É necesario que a xente vexa á policía como un servizo público, igual que cande se precisa dun fontaneiro, como algo cercano ao cidadán. Teño interiorizado o lema de 'prohibido prohibir'. O noso traballo é unha cuestión de valores. Nunha sociedade avanzada todo o mundo ten que saber o que ten que facer. Iso facilita as cousas. Logo, xa sei que as cousas non son sempre así, pero eu teño a obriga de transmitir eses valores. Equivocareime moitas veces, pero esa é a miña filosofía. Logo xa sei que no día a día haberá outras necesidades.