Os amantes do bo balonmán teñen hoxe unha oportunidade única de disfrutar dun partido de luxo na bisbarra. Da man do Torneo Concello de Meaño, esta tarde ás oito e media, Pevafersa Valladolid e Cangas do Morrazo traen o balonmán Asobal ata o Pavillón de Coirón.
A boa relación persoal entre o alcalde de Meaño, Jorge Domínguez, e o presidente do Pevafersa Valladolid, Dionisio Miguel Recio, deu pé á celebración do encontro, que trae ata Meaño o actual campión da Recopa de Europa. Adestrado polo estratega do único Mundial gañado pola selección española de balonmán, Juan Carlos Pastor, o cadro pucelano chega cun plantel de primeira calidade recentemente reforzado polo porteiro internacional sueco Tomas Svensson. Na mente do Valladolid, as cinco competicións que disputará esta tempada.
Pola súa banda, o Cangas desprázase a Meaño cun plantel ben apuntalado tras o seu ascenso de regreso á Liga Asobal a pasada primavera, con caras novas coma a do porteiro internacional montenegrino Milan Kosanovic ou a do extremo Antonio Ugalde.