O colectivo Casaescola ven de organizar para mañá, ás oito da tarde no auditorio de Vilagarcía, un acto informativo sobre os cuestionarios remitidos pola Xunta aos pais sobre o uso do galego no ensino. Nese acto participarán membros de distintos equipos de normalización lingüística dos centros de ensino do municipio.
Casaescola decidiuse a convocar este acto, explica o colectivo, porque «sabemos que neste momento hai centros da nosa localidade onde, debido á prohibición da inspección educativa, impediuse unha achega de información ás familias por parte dos docentes ou das Anpas». Algo que non lle parece de recibo: tendo en conta que as enquisas «serán tidas en conta á hora de deseñar as futuras políticas lingüísticas no ámbito da educación non universitaria de Galicia», resulta lóxico pensar que os pais deben ter toda a información ao seu alcance para poder elixir e, ademais, para lograr plasmar a súa elección nas respostas da enquisa. Porque, segundo afirma Casaescola e con ela outros moitos colectivos educativos, as preguntas tal e como están plantexadas son «ambiguas e imprecisas». Fan referencia ás «asignaturas troncais», un detalle que fai que «por exemplo, cando un pai/nai queira manifestar que desexa que o seu fillo reciba o 50% das materias en galego, deberá escoller a opción que na enquisa aparece como 'todas en galego'». «Lamentamos que unha vez que se di consultar ás familias, se leve a cabo unha consulta tan irregular, precipitada e sen ningún valor científico, onde a información brilla pola súa ausencia e prohibindo o debate nos centros, necesario ante un tema tan trascendente como o futuro do galego».