Meses despois do seu xeitoso pase nos Multicines Gran Arousa, nos que tuteou na súa primeira fin de semana co mesmísimo Indiana Jones, Pradolongo (45.000 espectadores xa) volta esta noite a Vilagarcía. Mais non a unha sala de exhibición ao uso, senón á praza Rafael Pazos, de Vilaxoán, onde se proxecta a partir das dez e media.
O sistema de proxección introduce unha importante innovación, da man da produtora Mr. Misto, dirixida por Xoán Mariño. É a primeira vez que se emprega un sistema de pantallas inchables, con imaxe dixital en alta definición co formato HD. A calidade é ata catro veces superior ao do vello sistema de DVD e mesmo supera o soporte cinematográfico. «O que permite este sistema é disfrutar o filme no seu formato orixinal de gravación», explicou Mariño. Noutras palabras, o que o director viu e plasmou, está en pantalla. A fórmula, testada en Cambados o pasado luns, funciona perfectamente e será empregada noutros puntos do Estado.
A proxección de Vilaxoán é a primeira dunha xeira que percorrerá as principais vilas de Arousa. Mais mergúllase tamén na iniciativa de promoción dos Camiños de Santiago. Así se explica a participación da sociedade pública Xacobeo, que onte representou no auditorio Marcial Rodríguez.
O programa enteiro, impulsado pola Consellería de Cultura, acada unhas oitenta proxeccións en vilas e cidades de Galicia e Portugal. María Xesús López Escudeiro, delegada en Pontevedra, gabou unha iniciativa que na súa opinión supón «unha ollada ao mundo dende Galiza». Por fin, tamén a iniciativa privada, grazas ao patrocinio de Gadisa, implícase na construción dunha aposta cinematográfica propia. «É -apuntou Antonio Cortés- unha mostra da nosa responsabilidade social corporativa».
O propio director, Ignacio Vilar, participou nunha presentación que serviu para anunciar que Pradolongo vén de gañar o premio á mellor banda sonora e á mellor composición no festival de Úbeda.