Meaño, en concreto o adro da Capela das Angustias, será este domingo a capital galega da billarda. Alí disputarase, desde as catro de serán, unha proba «á que virá xente de toda Galicia», di Abel Cancela.
-Como se meteu vostede nisto da billarda?
-Miramos en Internet o dos xogos tradicionais. Vimos isto da billarda e contactamos cuns de Lourenzá. Fixemos un intercambio hai catro anos. Eles trouxeron as fabas e nos puxemos o viño
-Pero o do domingo é algo máis grande.
-Virán corenta persoas de toda Galicia.
-É moi difícil collerlle o truco ao xogo? Hai que estar forte para poder xogar?
-O que vale é a práctica. É un tema máis de maña que de forza. O campión de hai catro anos era un chavaliño delgado.
-Xogan mulleres tamén?
-Si que o fan. Da outra vez xogou unha de sesenta anos que se lembraba de que xa xogaba de pequena
-Como se xoga?
-Hai que ter a pala e a billarda. Xógase a pares e hai que metela nun coito.
-E o que non teña material para xogar pode apuntarse igual?
-Si, haino aquí. Normalmente a xente que xoga trae cadanseu material. Teñen as palas pintadas. O que lle ten cariño tenlle algunha cousa escrita.