a pie de calle «Cada orquestra quere personalizar o seu escenario, ter o seu palco»

Alberto Viamonte (Sargadelos-Cervo, 1968) e Sandra García son os artífices do grupo Alma Latina, que celebra o seu quinto aniversario con varias novidades. Ao ano fan unhas 70 actuacións por Galicia e Asturias e neste momento teñen fixas máis de 50 galas para a época estival.

-¿Como naceu Alma Latina?

-Tanto Sandra coma min viñamos de tocar en orquestras (eu tamén estiven no grupo folk Nordés). Nos coñecimos, éramos músicos e decidimos facer un grupo noso e pequeno, un cuarteto. Cumprimos cinco anos e dende setembro do ano pasado incorporamos dous membros: Arantxa de Acevedo (Burela) e Tony Cazás (Viveiro) que foi gañador do Festival do Landro. Eles xa estiveron en orquestras. Un grupo que ten xa cinco anos non pode arriscar a meter xente que non teña experiencia musical.

-E estrearán tamén un camión-escenario móbil. ¿Necesitábano?

-É unha necesidade, pero tamén porque cada orquestra quere personalizar o seu escenario, ter o seu palco. É cómodo tanto para a orquestra como para as comisións. Supón tocar nun ambiente que nos guste.

-¿Lembra algunha gala en particular nestes 5 anos de Alma Latina?

-Lembro moitas... Para min é difícil sinalar unha. Quizais a Queimada de Cervo hai dous anos. Alí tocaba de pequeno a gaita con Airiños do Xunco e durante moitos anos non podía ir por traballo. Foi unha satisfacción seguir traballando e actuar no meu pobo.