Medio Rural deu por extinguido o incendio forestal de Quiroga
Quiroga
Segundo as últimas medicións, o lume queimou algo máis de 26 hectáreas
29 Jul 2020. Actualizado a las 15:50 h.
A Consellería de Medio Rural deu por extinguido ás 13.28 horas de hoxe o incendio forestal que se orixinou na madrugada de onte no municipio de Quiroga. Segundo as últimas medicións, o lume queimou un total de 26,05 hectáreas, das que 10,09 son de superficie arborada e 15,96 de monte raso. Nos traballos de extinción participaron dezaseis brigadas e catro axentes forestais, co apoio de cinco motobombas, unha escavadora, cinco helicópteros e tres avións.
Segundo as primeiras estimacións realizadas por Medio Rural, o incendio podería ter afectado ata trinta hectáreas. Os terreos que resultaron calcinados atópase no territorio da parroquia da Enciñeira e, segundo o alcalde, Julio Álvarez, o lume tamén afectou ao municipio límitrofe de Larouco, na comarca ourensá de Valdeorras. O incendio comezou pasadas as dúas da madrugada e non se estabilizou até as 18.00 horas de nonte.
O municipio, durante a época do verán, adoita verse afectado por incendios forestais de importantes magnitudes. O pasado once de xullo foron calcinadas unhas dez hectáreas de superficie de arboredo, concretamente na parroquia de Vilar de Lor, nun incendio que se mantivo en activo aproximadamente unhas sete horas, ata que rematou sendo controlado.
Do mesmo xeito, en setembro do ano pasado, un lume orixinado na parroquia de Vilañán afectou máis de 150 hectáreas de monte. Previamente, durante o mes de xullo do mesmo ano, tamén se deron incendios -en repetidas ocasións- nas inmediacións da N-120, provocando cortes na circulación da estrada e na vía do tren.
En canto á xestión e o control da problemática existente cos incendios que se adoitan dar na zona, o alcalde do municipio apunta á importancia da responsabilidade individual e consiodera que, dentro das posibilidades, os efectivos de loita contra incendios en Quiroga son os axeitados. «É evidente que non pode haber un policía ou garda detrás de cada cidadá. Dentro do razoable, existe unha boa conxunción de medios contra a loita incendiaria forestal», afirma o rexedor.