A vida e obra de Castelao transfórmanse nun cómic

A Komic Librería de Santiago, a primeira de Galicia especializada en banda deseñada, converterase este venres ás 18.00 horas nun espazo no que recordar a unha das grandes figuras da cultura galega: Alfonso Daniel Rodríguez Castelao. Co gallo do 75.º aniversario do seu pasamento, a libraría acollerá a presentación de Castelao integral (Demo editorial), un volume que recompila a serie de catro títulos de banda deseñada sobre a vida e obra do escritor e político rianxeiro, creación de Inacio Vilariño (guión) e Iván Suárez (debuxo), que presidirán o acto xunto ao editor e ilustrador Manel Cráneo.

Esta nova reedición, composta polos tomos O pobre tolo, Titoán, Máis alá! e Atila, e que contou co apoio da Deputación da Coruña para a súa publicación, preséntase nunha edición de luxo encadernada en tapa dura coas cubertas impresas en tinta ouro e prata. Limitada a só 500 exemplares, é esta unha peza imprescindible para coñecer polo miúdo a personalidade dun dos maiores defensores da cultura e a lingua galegas.

«É un percorrido biográfico pola vida de Castelao que vai sempre acompañado dunha certa reflexión sobre o seu proceso creativo, xa fora á hora de escribir un ensaio ou un conto ou de facer un debuxo», explica Inacio Vilariño. Por iso, o cómic aborda algunhas das vivencias clave que moldearon o pensamento e a obra do autor de Sempre en Galiza. «En Titoán, por exemplo, exploramos quen era realmente o personaxe de Peito de Lobo que aparece en Retrincos e que, parece ser, estaba inspirado nun veciño de Castelao», sinala Vilariño.

Por outra banda, en O pobre tolo os autores levan ao escritor ata o seu desterro en Badaxoz, acaecido en 1934 debido a súa actividade política. Nesa sorte de exilio interior, Castelao coñecerá a outros galegos afincados en Estremadura e, nunha viaxe a Portugal, adquirirá un exemplar da obra O pobre tolo, de Teixeira de Pascoaes, o cal marcará esta importante etapa da súa vida. Na terceira entrega, Máis alá!, volvemos atrás no tempo ata situarnos en 1921, ano que marcou a estadía de Castelao en París. Os seus percorridos polos museos da capital francesa servirán de escusa para coñecer a súa opinión sobre as artes e os movementos de vangarda que estaban agromando naquel intre. E no último tomo, Atila, o fío condutor será a entrevista que o escritor lle concederá á xornalista e dramaturga Magda Donat.

Todo isto, por suposto, vén acompañado polas minuciosas ilustracións de Iván Suárez, quen foi merecedor do Premio Castelao de Banda Deseñada 2011 polo seu traballo en Titóan.