Unha aldea do Courel onde vai abrir un negocio de turismo leva un mes sen telefonía móbil

Os veciños da localidade de Teixeira levan un mes sen cobertura pola inestabilidade do seu servizo de telefonía móbil contratado. O Concello de Folgoso do Courel dirixiuse en varias ocasións á empresa de telecomunicacións Movistar para que repare o repetidor encargado de manter a rede da zona.

A instalación do repetidor entrara no Plan de Banda Ancha 2010-2013, mediante o cal foron instalados equipos encargados da cobertura e do funcionamento da televisión nos fogares de áreas dispersas de Galicia. O repetidor foi financiado pola Xunta, mentres que o Concello cedeu o terreo para a instalación. Dolores Castro, alcaldesa de Folgoso do Courel, recalca que «lle corresponde á empresa garantir un funcionamento axeitado».

Altas temperaturas

Castro indica que, malia as numerosas peticións dos veciños e do Concello, Movistar «non deu unha solución definitiva» e que a compañía se limitou a indicar que «a avaría pode ser polas altas temperaturas e hai que facer unha revisión».

Entre as problemáticas que enumera a alcaldesa con respecto ás deficiencias do repetidor, sinala: «Dentro de pouco en Teixeira vai abrir un negocio de turismo e, si se segue interrumpindo así a cobertura, o terá difícil». Ademais, Castro destaca que a maior parte dos habitantes son de idade avanzada e que «necesitan cobertura para comunicarse».

A alcaldesa conta que os veciños de Teixeira piden respostas ó Concello, mais ela recalca que é algo que escapa das súas capacidades. Aínda así, Castro está a redactar un novo escrito para a empresa no que incluirá «todas as queixas dos veciños» e que enviará tamén á Xunta e ao Ministerio de Economía, do que dependen as compañías de telecomunicacións, «para que haxa coñecemento do que está a pasar e non tarden en solucionalo».