«Hai nervios na primeira gran proba da súa vida»

Ricardo Vigueret ten un fillo, Ricardo, no instituto Maximino Romero, en Baio (Zas). A estas alturas, Vigueret sabe coma ninguén cousas que nunca pensara que lle interesaran, como as prazas que oferta cada facultade, e iso que é profesor tamén, aínda que da ESO.

-Unha familia cun fillo en segundo de bacharelato pasa o ano en vilo, non si?

-Si. Sabiamos que segundo era duro, pero vemos que está totalmente condicionado pola ABAU. Non debería ser así, pero o é.

-Hai inquietude?

-Este ano especialmente. Chegou o primeiro trimestre e non había información, os pais faciamos presión aos fillos, e eles ós profesores...

-Como docente podería estar acostumado.

-Son profesor de ESO, pero este curso ten moito máis estrés e todos estamos obsesionados coa media. As notas si condicionan, o ambiente é de nerviosismo. Moitos deles levan seis anos xuntos, dende secundaria, pero esta é a primeira gran proba da súa vida.

-Como o leva o seu fillo?

-É tranquilo, e vese confiado. El quere facer algo de enxeñaría, coma Informática, e na Coruña ten un 7 pero en Santiago case un 10. Pero o leva ben, porque ve como va o curso e é raro patinar na proba. Claro que o difícil non é aprobar, é sacar nota, porque non todos poden ir á carreira que queren.

-Cando chegue xuño, como van celebrar o final do curso?

-Nós de xeito normal, e os rapaces, como moitos cumpren os 18, xa están pensando no carné de conducir.