Marquitos, adestrador do Club Lemos: «Prefiro gañar por 5-4 que por 1-0»

Marquitos logrou dous ascensos como futbolista. Un co actual Ourense CF, anteriormente Ponte, a Terceira, e outra co Polígono a Preferente. Con 21 anos deixou o fútbol en activo e pasou aos banquillos. Leva 35 anos como adestrador.

—O mellor adestrador.

—Pep Guardiola.

—O mellor futbolista do mundo na actualidade.

—Lamine Yamal.

—Que banquillo soñaba con ocupar cando comezou a adestrar?

—O do antigo CD Ourense. Sempre tiven esa ilusión. Pero o fútbol recompensoume coa miña presenza en Mareo durante catro tempadas. Alí coñecín a Marcelino García Toral e a Quini. Estiven de titor da residencia.

—Un debuxo táctico.

—1-4-2-3-1

—Prefire gañar 1-0 ou 5-4?

—Os meus equipos xa o demostran nos partidos. Prefiro gañar 5-4.

—Cociña galega ou asturiana?

—As dúas. Cachopo regado con sidra e con fabes, un prato delicioso. Pero o polbo á feira tamén me encanta.

—Cal é a súa especialidade na cociña?

—A tortilla española. As que fago son espectaculares.

—Ten moita paixón polo fútbol?

—Si. De feito, nunha hora saio para presenciar o partido entre o Polígono e o Celanova, porque este último é un rival contra o que aínda temos que xogar.

—A que xogador do Club Lemos levaría de cañas?

—Se levo a Youness acaba comigo. Elixo ao capi, Dafonte.

—E a que futbolista lle confiaría as chaves da súa casa ou do seu piso?

—A Emmanuel, que é unha persoa seria.

—Que sería capaz de facer se leva ao Club Lemos á Terceira Federación?

—Facer o Camiño de Santiago.

—Que mensaxe lle traslada á afección lemista?

—Que sigan apoiando a estes futbolistas, que están comprometidos para levar ao Lemos á Terceira Federación. Como dixen, teñen moitas ganas de facerlle ese agasallo.