A memoria de Amada García segue viva en Ferrol, cos actos deste sábado

O 27 de xaneiro de 1938, Amada García e outros sete compañeiros foron asasinados no foxo do castelo de San Felipe (Ferrol) pola defensa dos seus ideais republicanos. Pola súa memoria seguen loitando os seus familiares e entidades como a asociación Memoria Histórica Democrática. Este sábado celébrase un acto de lembranza tanto no castelo como no cemiterio de Serantes, onde foron enterradas estas oito vítimas do franquismo.

Xunto coa mugardesa Amada García, militante do PCE que con 27 anos acababa de dar a luz a un neno e que tiña outra filla, foron fusilados Antonio Eytor Cañizo (57 anos e carpinteiro de Mugardos), Jaime González Pérez (31 anos e dependente de farmacia de Ares), Germán López García (50 anos de Caamouco en Ares), José María Montero Martínez (39 anos e enterrador de Mugardos), Ramón Rodríguez López (38 anos de Ares), Ángel Roldós Gelpi (mestre nacional de 50 anos e de Mugardos) e Juan José Teijeiro Leira (42 anos e mariñeiro de Mugardos).

Todos militaban en partidos ou sindicatos de esquerdas.