«O monitor non ten que ser só unha persoa moza»

O vindeiro día 23 comezará a impartirse en Lalín o curso de monitor de actividades de tempo libre, que desenvolverá a escola Aloumiña que dirixe Rocío Couto Rendo.

-¿Para que serve exactamente un curso destas características?

-É un curso co que se lle dá a unha persoa a formación que pode precisar á hora de traballar cun equipo de persoas en actividades de tempo libre, tal como recolle o título do mesmo. É un curso que capacita para desenvolver actividades de lecer con nenos, mozos ou tamén con persoas maiores. Nas clases que se impartirán ata o vindeiro mes de maio haberá tempo para deseñar, dirixir e ver de que maneira se executa un obradoiro, como traballar actividades de grupo e desenvolver proxectos de animación.

-A cotío ollamos que é a xente moza a que se anota en cursos desta índole...

-É certo que existe un perfil de xente moza que é a que está nesta área pero é importante que se saiba que non estamos ante algo pechado. O monitor non ten que ser só unha persoa moza. Toda persoa que teña curiosidade e interese neste eido do desenvolvemento de actividades de tempo libre pode anotarse neste curso. De feito xa estamos atopando nos cursos a xente máis maior; non só asisten mozos e mozas.

-As clases serán en fins de semán para non solapar outras posibles actividades cotiás dos futuros alumnos...

-Así está programado. Comezaremos o 23 de marzo; para seguir o 29 e 30 e logo estaremos ata o 4 maio coa fase teórico-práctica sempre con clases na fin de semán. En total son 200 horas lectivas e logo está unha fase práctica que consistirá en asistir a colonias ou campamentos por espazo de 12 días, e outras 150 horas de actividades nalgunha entidade que traballe no eido do tempo libre. Salientar que estamos falando dun curso que está homologado pola dirección xeral de Xuventude que é necesario para desenvolver actividades de tempo libre.

-¿Restan prazas?

-Malia que a acollida na zona está a ser moi boa quedan algunhas prazas disponibles.

rocío couto directora da escola de tempo libre aloumiña