A REGUEIFA SEMANAL | «Xa mo dixo o novo alcalde... nunha frase con destellos»

Hoxe vou cantar un pouco

que disque son regueifeira

vou ca Festa da Pataca

que tamén son pataqueira

Estamos moi agradecidos

ao Concello polas festas

o mellor que nos pasou

é que limpan as cunetas

Alí xa cantou Blanquiño

hai trinta anos que finou

a festa ten trinta e oito

pero pouco variou

Se non vistes o programa

por aquí ou noutro lado

podedes estar tranquilos

que é coma o do ano pasado

Atrás quedan eses tempos

nos que tiña enerxía

era feudo do PP

con Cuiña e Beccaría

Xa mo dixo o novo alcalde

nunha frase con destellos

esta Festa da Pataca

é unha festa pos vellos

Debe ser ben complicada

sempre lles entra a présa

e para que se van matar

se contratan unha empresa

Tamén todo sexa certo

que para que a van cambiar

segue vindo moita xente

como ao programa Luar

Díxoo Rober Bodegas

nun monólogo que vin

os tractores da pataca

inventaron o tunning

Outra cousa que se nota

que tamén hai que contala

quitaron as azafatas

que alí non pintaban nada

Pero seguimos ca festa

iso eu non llo discuto

o mellor de Coristanco

é que temos bo produto

Pois que viva Coristanco

e a pataca pa comela

pataca de Coristanco

non hai outra coma ela